اسرائیل نےسپائس 2000 بموں کی پہلی کھیپ بھارت پہنچا دی

بھارت کی ائیر فورس کو حال ہی میں اسرائیل سے سپائس 2000 قسم کے بم ملنا شروع ہو گئے ہیں، جس کی پہلی کھیپ گوالیار کے ایئر بیس پر پہنچ گئی ہے۔

بھارتی ایئر فورس نے یہ بم اس سال فروری میں بالاکوٹ پر فضائی حملوں میں استعمال کیے تھے۔ ان بموں کو عمارتیں تباہ کرنے والے بم بھی کہا جاتا ہے۔

ٹائمز آف انڈیا نے بھارتی ایئر فورس کے ذرائع کے حوالے سے بتایا گیا ہے کہ اسرائیل کی ایک کمپنی نے بھارت کو سپائس 2000 بم بھیجنے شروع کر دیے ہیں جن کی پہلی کھیپ حال ہی میں گوالیار پہنچی ہے۔

گوالیار بھارتی ایئر فورس کے میراج طیاروں کا مرکز ہے اور بھارت نے اپنے میراج فائٹر طیارے اس ایئر بیس پر رکھے ہوئے ہیں۔

سپائس 2000 بموں کو گوالیار اس لیے بھیجا گیا ہے کیونکہ صرف میراج طیارے ہی ان اسرائیلی بموں کو اہداف پر داغنے کی صلاحیت رکھتے ہیں۔

بھارتی ایئر فورس نے اسرائیل کے ساتھ 250 کروڑ روپے سے زیادہ مالیت کے مارک 84 قسم کے بموں کی خرید کا معاہدہ کیا تھا جو عمارتوں کو مکمل طور پر تباہ کرنے کی صلاحیت رکھتے ہیں۔

اس سال جون میں انڈین ایئر فورس نے بم تیار کرنے والی کمپنی کے ساتھ ایک اور معاہدے پر دستخط کیے جس میں ایک سو سے زیادہ بم ایمرجینسی کے پیش نظر فوری فراہم کرنے کے لیے کہا گیا تھا۔

بھارتی ایئر فورس نے بموں کی جلد فراہمی کا نیا معاہدہ پاکستان کے قصبے بالاکوٹ کے قریب جیش محمد کے خلاف ان بموں کے استعمال کے بعد کیا۔

بالاکوٹ فضائی حملوں میں بھارتی ایئر فورس نے میراج 2000 طیاروں سے سپائس 2000 بم گرائے۔ یہ بم گرانے کے لیے 12 میراج لڑاکا طیارے لائن آف کنٹرول عبور کرنے کے بعد صوبہ خیبر پختونخوا کی فضائی حدود میں داخل ہوئے تھے